Trajneri i Interit, Rafa Benitez, është duke u përgatitur të bëjë ndryshime në formacionin e ekipit pas fillimit të ngadalshëm të sezonit, ka shkruar të enjten e përditshmja sportive italiane Gazzetta dello Sport.

Nerazzurrët barazuan 2-2 në udhëtim te Twente të martën dhe u desh të mundohen mjaft për të mposhtur Udinesen në xhiron e dytë në Serie A (pas barazimit pa gola me Bolognan), duke zgjuar brenga rreth formës së tyre në këtë fillim të sezonit.

Gazzetta ka mësuar se Benitez është duke menduar për ndryshimin e sistemit për t’i ndihmuar më tepër repartit të mesfushës. Inter është mysafir i Palermos në fundjavë dhe Benitez mund të hedhë në fushë formacionin 4-3-1-2 në vend të 4-2-3-1.