Klubet më të mëdha të Serisë A janë të interesuara për mesfushorin e Totenhemit, Geret Bejl, për të cilin mund të veprojnë në merkaton e janarit.

Mesfushori 21-vjeçar po vijon formën e shkëlqyer të sezonit të kaluar me fanellën e "Gjelave” edhe në këtë sezon, duke u shndërruar në një nga objektivat kryesorë për klubet evropiane. Prej kohësh, Hoze Mourinjo është një nga admiruesit e tij kryesorë, ndërkohë që sipas "Italsportpress”, madrilenëve i është shtuar edhe treshja italiane Inter-Milan-Juventus.

Në maj, mesfushori i majtë rinovoi edhe për katër vjet të tjera kontratën me Totenhemin. Kjo do të thotë që klubi i Premier Ligës (që sivjet merr pjesë edhe në Ligën e Kampionëve) do të kërkojë një dorë të mirë parash për ta lënë të lirë futbollistin e talentuar.